Лениногорскида наркотик матдәләр тәэсирендә булган шофер инспекторлардан качкан һәм һәлакәт тудырган

Автомобиль руле артына утырган 1990 нчы елгы ир-ат автоинспекторларның тукталырга дигән боерыгына буйсынмыйча, алар белән куышлы уйнарга керешкән. Артыннан эзәрлекләп килүче юл хәрәкәте иминлеге хезмәткәрләреннән качарга маташып, ул УАЗ автомобиленә килеп бәрелгән.

Шофер медицина тикшерүе үтүдән баш тарткан, әмма соңрак аның наркотик матдәләр тәэсирендә булуы ачыкланган. Хокук бозучы полиция бүлегенә китерелгән һәм аңа карата административ материаллар төзелгән. 

Закон белән уйнарга теләүчегә РФ Административ хокук бозулар Кодексының 19.3 маддәсе 1 өлеше -полиция хезмәткәренең законлы боерыгына буйсынмаган өчен Лениногорск шәһәр суды карары белән 7 тәүлеккә административ кулга алу җәзасы билгеләнгән.

Шуңа өстәп, РФ Административ Кодексының 12.25 маддәсе  1 өлеше -транспорт чарасын туктату турындагы таләпне үтәмәгән өчен  10 мең сум штрафка тартылган.

РФ Административ хокук бозулар Кодексының 12.26 маддәсе 1 өлеше нигезендә  медицина тикшерүен узудан баш тартуы һәм  17.17 маддәсе буенча - исерек хәлдә транспорт чарасы белән идарә итүе өчен законда каралган җәзаны алган.