Узган ел Лениногорск автоинспекциясе 240тан артык исерек хәлдә идарә итү очракларын ачыклаган

Лениногорск дәүләт автоинспекциясе хезмәткәрләре тарафыннан 2025 елда транспорт чаралары белән исерек хәлдә идарә итүнең һәм исереклек торышына медицина тикшерүе узудан баш тартуның 242 очрагы ачыкланган.

Әле шушы көннәрдә дә юл-патруль хезмәте хезмәткәрләре Volkswagen Tiguan автомобилен туктаткан, аның йөртүчесендә ачыктан-ачык исереклек билгеләре күренгән.

Ир-ат исә исерү халәтенә медицина тикшерүе узудан баш тарткан.

Шоферга карата административ беркетмә төзелгән. Транспорт чарасы махсус стоянкага озатылган. 

Әлеге факт буенча материаллар Лениногорск судына җибәреләчәк. 

Административ хокук бозулар кодексы буенча шоферга карата 45 мең сум штраф һәм 1,5 елдан 2 елга кадәр транспорт чарасын йөртүдән мәхрүм итү.

2026 елның гыйнвар аеның беренче 15 көнендә машина йөртүчеләр тарафыннан 12 хокук бозу очрагы ачыкланган, шул исәптән транспорт чарасы белән исерек килеш кабат идарә итүнең 2 очрагы бар, алар буенча машина йөртүчеләр җинаять җаваплылыгына тартылачак, дип хәбәр итә Лениногорск ДАИ бүлеге.