Узган ел Лениногорск районында юл-транспорт һәлакәтләрендә 11 кеше һәлак булган

2024 елда юл хәрәкәте иминлеген тәэмин итү һәм юл-транспорт һәлакәтләре санын киметү буенча үткәрелгән чаралар турында Лениногорск районы буенча ЮХИДИ  бүлеге башлыгы Елена Никитина сөйләде.

Елена Александровна әйтүенчә, 2024 елда барлыгы 46 юл-транспорт һәлакәте теркәлгән, шулар нәтиҗәсендә 11 кеше һәлак булган, 52 кеше җәрәхәтләр алган.  “Юл-транспорт һәлакәтләренең төп сәбәпләре –  транспорт чарасының машина йөрү өлешендә урнашу кагыйдәләрен бозу, каршы як хәрәкәт полосасына чыгу һәм башкалар”, - диде Елена Никитина.

2024 елда юл хәрәкәте кагыйдәләрен бозуның 6260 очрагы теркәлгән. Шулардан исерек килеш транспорт белән идарә итү - 240,, каршы як полосага чыгу (узып китү) – 213, транспорт чарасы белән йөртү хокукы булмаган килеш идарә итү – 86, җәяүлеләргә юл бирмәү – 65,  куркынычсызлык каешын каптырмау очраклары - 1380 һәм башкалар бар.

2024 елда автомобиль ДАИ хезмәткәрләре тарафыннан шәхси мобиль чаралары хәрәкәте өчен файдаланучы 30дан артык хокук бозучы җаваплылыкка тартылган. Аларның иң киң таралганнары – электр самокатында ике кеше утырып йөрү һәм питбайкларда йөрү. Махсус стоянкаларга 15 питбайк куелган, шуларның тугызы белән 16 яшькә җитмәгән балигъ булмаган балалар идарә иткән.

“Шуңа күрә безгә авыл җирлекләре башлыкларының да ярдәме кирәк, чөнки алар кемнең гаиләләрендә бу техника барлыгын һәм кемнең балалары йөри икәнен беләләр, шулай ук гомум белем бирү учреждениеләрендә сыйныф сәгатьләрендә мондый транспорт чараларында йөрүнең куркынычлыгы турында аңлатырга кирәк”, - диде Елена Никитина.