Район башлыгы Рәгать Хөсәенов Җиңү көне белән тәбрикли

Бөек Җиңүнең 74 еллыгы уңаеннан иң җылы һәм ихлас котлауларны кабул итеп алыгыз. 9 май - һәркем өчен изге, илгә Җиңү килгән көн. Ул безнең өчен күз яшьле бәйрәм, чөнки Ватаныбыз азатлыгы һәм бәйсезлеге өчен гомерен биргән кешеләрне искә алабыз.

Бөек Җиңү җиңел бирелмәде. Бездә сугыш читләтеп үтмәгән, бер генә гаилә дә юк. Һәм без бу хакта истә тотарга, сугыш китергән авырлыкларны киләчәк буыннарга җиткерергә тиешбез. 

Бу бәйрәм көнендә иң җылы котлаулар һәм рәхмәт сүзләрен без, барыннан да элек, ветеран – фронтовикларга, тыл хезмәтчәннәренә, сугыш чоры балаларына, сугыш авырлыкларын үз җилкәләрендә күтәргән һәм дошман әсирлеген үткән кешеләргә юллыйбыз.  Алар илгә җиңү алып килгән, киләчәк буыннарга тормыш бүләк иткән җиңүчеләр буыны. Һәлак булган һәм хәбәрсез югалган якташларыбызның якты истәлеге туганнары һәм якыннары күңелендә саклана. 

Хөрмәтле лениногорскилылар! Бу бәйрәм көннәрендә чын күңелдән сезгә сәламәтлек, якты һәм тыныч көннәр, күңел җылысы, якыннарыгызның игътибарын һәм кайгыртуын тоеп яшәвегезне телим! Җиңү көне белән!

Рәгать Хөсәенов,  муниципаль район башлыгы,  шәһәр мэры