Лениногорскида сугышчы-интернационалистлар һәм Чернобыль АЭСындагы авария ликвидаторлары һәйкәлләре - мемориаль комплекслар янында «Хәтер чәчәкләре» акциясе кысаларында төзекләндерү эшләренең чираттагы этабы узды.
«Беренчеләр хәрәкәте»ндә катнашучы 5 нче мәктәп укучылары Ватанны саклаучылар гаиләләре комитеты вәкиле Сания Арсланова белән бергә чәчәкләр утыртуны дәвам итте.
Аларга Ирек Андреевич һәм Асия Игламовна Петровлар гаиләсе дә кушылды. Алар өчен бу — намус эше, чөнки гаилә башлыгы Чернобыль АЭСындагы авария нәтиҗәләрен бетерүдә катнашкан. Петровлар гаиләсе күпьеллык чәчәкләрнең тамырчаларын алып килгән, алар һәйкәлләр янында үз урыннарын тапты.
«Ләкин моның белән генә тукталып калмыйбыз. Әлеге территорияне яфраклардан һәм плитәләр арасындагы үләннән чистартырга планлаштырабыз», — дип уртаклашты Сания Арсланова.
Ул «Хәтер чәчәкләре» акциясендә катнашучыларның барысына да рәхмәт белдерә: «Безнең белән булган һәркемгә зур рәхмәт! Безнең кайгырту — иң яхшы хәтер».
Нет комментариев