Роспотребнадзор туристларны Таиландта Денге бизгәге таралуы турында кисәтә

 Бу хакта ведомство сайтындагы хәбәргә сылтама белән Интерфакс хәбәр итә.

«Хәзерге вакытта Таиландта Денге бизгәге буенча эпидемиологик имин булмаган хәл теркәлә. 2019 ел башыннан Таиландның Үзәк һәм Көньяк районнарында кешеләр арасында 30 меңнән артык авыру очрагы теркәлгән, шул исәптән соңгы 2 атнада - 21 мең очрак, шуларның 90ы үлем белән тәмамланган», - диелә хәбәрдә.

Матбугат хезмәте хәбәр иткәнчә, авырулар санының артуы чүп-чар һәм көчле эсселек сезоны башлану белән бәйле. Денге бизгәгенең төп таратучылары - черкиләр.

Кулланучылар хокукларын яклау һәм кеше иминлеге өлкәсендә күзәтчелек федераль хезмәте бөҗәкләр тешләүдән саклау максатында тәнне каплый торган өс киемнәре кияргә, аларны куркытучы һәм юк итүче чаралар кулланырга, биналарда тәрәзәләргә һәм ишекләргә челтәрләр эләргә киңәш итә.

Ведомствода билгеләп үтүләренчә, Таиландтан кайткач сәламәтлек торышы начарайган очракта, сәяхәт урыныңны әйтеп, табибка мөрәҗәгать итәргә кирәк.
 

Бу хакта тулырак: http://tat.tatar-inform.ru/news/2019/06/02/187360/

фото:pixabay.com