Кер бавына уң ягы белән эленгән кием мәет сорый...
Бәләкәй чактан картәниләр авызыннан төрле ырым-шырымнар ишетеп үстек. Бүген дә, ниндидер шомлы бер серлелеккә уралып, күңелдә яши алар. Югач, кер бавына уң ягы белән эленгән кием мәет тели, ди иде өлкәннәр.
Чит кеше мендәрендә йокласаң - чәчең коелыр.
Киемне кигән килеш тексәң, бәхетеңне юк итәсең.
Өстәл өстен кәгазь белән сөртсәң - талашуга.
Ашагач, урындыкны өстәл янына яхшылап күчереп куймасаң, ирең ялкау булыр.
Ашаганда аякны селкеп утырырга ярамый - шайтан ияләшер.
Киемне сул ягы белән төрергә, кеше өлешен ашарга ярамый — бәхетсезлеккә.
Өстәлгә, тәрәзә төбенә, тупсага утырырга ярамый - чир, хәерчелек иярер.
Баш киеме белән уйнарга ярамый - башың авыртыр.
Китек савыттан ашарга ярамый - бәхетең кителер.
Кояш баегач өй җыештырсаң, кер юсаң - йорттан бәрәкәт китәр.
Савыт-сабаны юмыйча ятсаң - пәри туй үткәрер.
Кайчы белән уйнасаң - талашырсың. Һ.б. һ.б.
Кайбер ырым-шырымнарның фәнни нигезе дә барлыгы күптән билгеле инде. Мисал өчен, китек савыттан ашамаска кушкан борынгылар. Тикшеренүләр күрсәтүенчә, кителгән савытта организм өчен зарарлы бактерияләр үрчи һәм кеше тора-бара авыруга дучар була.
Башка ырым-шырымнар да буш урында барлыкка килмәгәндер. Бу серле дөньяда ниләр генә булмас!
Автор: Миләүшә Латыйпова
Фото:https://pixabay.com
Следите за самым важным и интересным в Telegram-каналеТатмедиа
Безнең Лениногорск яңалыклары Телеграм-каналга кушылыгыз.
Нет комментариев