Лениногорск кызы Мәрьям Бөтенроссия һөнәри осталык олимпиадасында өченче урын алды (ФОТОЛАР)

Ул вакытта Мәрьям Бөтенроссия һөнәри осталык олимпиадасының республика этабында “Ветеринария” белгечлеге буенча беренче урын алган иде.

Күптән түгел Ульяновск аграр университетында әлеге һөнәри осталык олимпиадасының икенче туры узды. Ул Идел буе федераль округы урта һөнәри белем бирү учреждениеләре арасында үтте. Ярышка Ульяновск, Самара, Саратов, Киров,Түбән Новгород, Татарстан, Мордовия, Башкортстан, Марий Эл, Удмуртиядән катнашучылар җыелды.

Татарстан данын безнең якташ кызыбыз – Мәрьям Магиззянова яклады. Мәрьям әйтүенчә, ярыш җиңелләрдән булмаган. Ветеринария һөнәре буенча теоретик һәм практик яктан тирән белемнәр таләп ителгән. Тик Мәрьям авырлыклар алдында сынатмый, беренче һәм икенче урынны Ульяновск  студентлары алса, өченче урында - Татарстан кызы.Үз өеңдә стеналар да ярдәм итә диләр, хужаларның призлы урынны алуы гаҗәп түгел, ә Мәрьямгә бары үз көченә ышанырга туры килде.

Олимпиаданың төп өлеше май аенда, Тамбов шәһәрендә узачак. Безнең студент кызыбызга анда катнашу өчен юллама бирелде. “Җиңү өчен барлык көчемне куячакмын, белемнәремне җигәчәкмен”, - ди Мәрьям. Аңа уңышлар телибез.

Мәрьям - Лениногорскиның 7нче мәктәбен тәмамлаган, хәзер Минзәлә авыл хуҗалыг техникумының өченче курсында белем ала.

Розалия Мостафина тексты