Лениногорскида җәяүле кичүендә булган авариянең нечкәлекләре билгеле

Лениногорскида узган җомга көнне 14 сәгать 11 минутлар тирәсендә Гагарин урамы, 29нчы йорт янында “Киа-Рио” машинасында баручы 45 яшьлек хатын-кыз юл кагыйдәсен бозып, олы яшьтәге ханымны бәрдерә.

75 яшьлек пенсионер нык җәрәхәтләр ала, “Ашыгыч ярдәм” машинасы килгәнче, җан бирә. Медицина хезмәткәрләре аның баш миендә ачык травма дип нәтиҗә ясаганнар.

Юл-транспорт һәлакәтендә гаепле булган хатын-кыз Краснокамская урамыннан Гагарин урамына таба велосипедта хәрәкәтләнүче, җәяүле кичүеннән чыгучы пенсионерга юл бирмәгән. Пенсионер ханым да бу очракта юл кагыйдәсен бозган: җәяүле кичүеннән чыкканда, велосипедтан төшмәгән.

Һәлак булган олы яшьтәге ханым 4 апрельдә туган көнен генә билгеләп үтүе билгеле. Ә шоферның гаебен Лениногорск суды хәл итәчәк.