Лениногорскидагы янгын турында өстәмә мәгълүмат һәм фотолар

Лениногорскида дүрт катлы йортта чыккан янгында 80 яшьлек әбинең гомере өзелгән. Фатирдагы янгын электр сәгатендә кыска ялганыштан башланган. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

66нчы янгын-коткару часте хезмәткәрләрен каршы алган кешеләр хуҗабикәнең өйдә булырга мөмкин икәнлеген әйткән.

Ут белән көрәшүчеләр махсус корал ярдәмендә фатир ишеген ачып кергән һәм идәндә яткан хатын-кыз мәетенә юлыккан. 80 яшьлек әбине урамга алып чыгып, ашыгыч ярдәм бригадасына тапшырганнар. Табиблар әбинең үлемен раслаган.

Башлангыч мәгълүматларга караганда, күпсанлы кием-салым һәм тукымалар саклана торган кладовкада электр приборларында (сәгать яки электр яктырткычы) кыска ялганыш хасил булган. Янгынның мәйданы 1 квадрат метр тәшкил иткән.

Бу хакта тулырак: https://tatar-inform.tatar/news/2019/03/11/182348/