Лениногорскилы штрафын түләмичә йөреп, янәдән штраф алды

1982 елда туган лениногорскилыга карата суд утырышы булды. Утырышның  сәбәбе – административ штрафны вакытында түләмәү.

Ир-ат штрафны ирекле түләү өчен законда билгеләнгән 60 көнлек срокка игътибар итмәгән, бәлки, белеп тә “оныткан”.
Суд аңа карата РФ КоАП 20.25 маддәсенең 1 өлеше буенча беркетмә төзеде (ягъни, административ җәзаны үтәүдән качу).

Эш материаллары белән танышканнан соң,  суд ир-атны гаепле дип таныды. Хәзер тәртип бозучыга тагын бер штраф – 1 000 сум күләмендә штраф түләргә туры киләчәк.

Лениногорск хокук саклау органнары штрафны вакытында түләмәсәң нәрсә булачагын кисәтә:
-    икеләтә күләмдә яңа штраф салу;
-    яисә 15 тәүлеккә кадәр административ арест
-    мәҗбүри эшләр.

Бурычларыгызны “Госуслуги” порталы яки ведомстволарның рәсми сайтлары аша вакытында тикшерегез. Вакытында түләү – артык чыгымнардан һәм суд тикшерүләреннән башка  иң яхшы ысул.