Район башлыгы Рәгать Хөсәенов Корбан бәйрәме белән котлау җиткерә

Олы бәйрәм көнендә һәркем Аллаһы Тәгаләдән киләчәк көннәргә өмет һәм ышаныч, гаиләләребезгә иминлек насыйп итүен, туган йортыбызга һәм илебезгә тынычлык сорап дога кыла.

Кайда гына булсак та бүген безне күңелләребездәге татулык, мәрхәмәтлелек, шәфкатьлелеккә омтылу хисләре берләштерә.
Мохтаҗларга ярдәм күрсәтеп һәм игелек кылып, һәрберебез аларның хәленә керә, күңелләренә бәхет иңдерә, йөрәкләренә шәфкать һәм мәрхәмәт орлыклары сала.

Бүгенге көндә Лениногорск районы - төрле милләт һәм дин вәкилләренең үзара дустанә, аңлашып яшәвенең күркәм үрнәге. Ислам, православие һәм башка традицион дин вәкилләренең бер-берсенә карата дус-тату, үзара хөрмәт хисләре саклап, ярдәмләшеп яшәве киләчәктә дә туган җиребезнең тотрыклы үсешенә ышаныч тудыра.

Сезгә җан тынычлыгы, сәламәтлек, муллык һәм иминлек телим!

Рәгать Хөсәенов, район башлыгы, шәһәр мэры.