Лениногорскида яшәүче кредит рәсмиләштерергә ниятләп мошенниклар капкынына эләккән

Озак көтәргә дә туры килмәгән,  аңа банк хезмәткәре шалтыратып 700 мең сумнан артык кредит хуплануы турында хәбәр иткән.  Әмма  акчаларны кредит алучының картасына  күчерү өчен 8 мең комиссия түләргә кирәген белдергән.  Бераздан банкның куркынычсызлык хезмәтеннән шалтыратып,  ир кешенең кредит тарихы  начар булганлыктан, кредитны  иминиятләштерергә дә  кирәклеген әйткән. Гариза бирүче барлык таләпләр белән дә ризалашкан һәм  үзенең картасыннан, гомумән алганда, 35 мең сумга якын акчасын  телефоннан әйтелгән номерга күчергән.  Әмма  акча сорау болай гына тәмамланмаган әле, тиз генә тәмамланмаган да булыр иде.  Тик ир кешегә курьер хезмәтләре өчен түләү үтенече белән шалтыратканнан соң,  ул мошенниклар тозагына эләгүен аңлап алган һәм кичекмәстән мошенниклык турында гариза белән Россия Эчке эшләр министрлыгының Лениногорск районы буенча бүлегенә мөрәҗәгать иткән.

Хәзерге вакытта полиция хезмәткәрләре җинаятьчеләрнең шәхесләрен билгеләүгә юнәлдерелгән оператив-эзләү  эшләре алып бара,  әлеге очрак буенча җинаять эше кузгатылды.

Лениногорск  эчке эшләр бүлеге гражданнарны чираттагы тапкыр телефон җинаятьчеләренең ятьмәсенә эләкмәс өчен,  уяу булырга чакыра. Нинди дә булса  банк хезмәткәре шалтыратып, кредит  рәсмиләштергәнче үк комиссия, иминиятләштерү  яки башка нәрсә өчен  түләү таләп итә икән, бу -мошенниклык билгесе. Андыйларның хәйләсенә эләкмәс өчен, кредитны тикшерелгән финанс оешмаларында гына рәсмиләштерегез.

Әгәр дә инде  шундый җинаятьчеләрнең  мәкерле тозагына эләккәнсез икән, кичекмәстән полициягә «02»телефоны аша хәбәр итегез.