Лениногорскилы ханым "банк бүләге"нә кызыгып, акчасыннан колак каккан

Хатын-кыз социаль челтәрдә танышыннан банк юбилее уңаеннан 5 мең сум күләмендә акча бирү турында хәбәр ала. Әле акчаны алу өчен карта номеры, картаның икенче ягындагы өч цифр һәм парольләрне танышына җибәрергә кирәк була. Танышы аңа 5 мең сум түләүне вәгъдә итә. Имеш, банк юбилее уңаеннан менә шундый бүләк ясый, син бу акчалата бүләкне алырга мөмкинсең дип, теге хатын-кызны ышандырган күрәсең.

Хатын-кыз карта реквизитларының барысын да хәбәр итә, аннан соң гына танышына шалтыратырга була. Бактың исә, танышы аңа бернинди хәбәр юлламаган, бернәрсә җибәрмәгән, социаль челтәрдә аның “бите” “ватылган” (взломана).

58 яшьлек хатын-кыз мошенниклар тозагына эләгүен аңлый. Полициягә мөрәҗәгать итә. Китерелгән зыян күләме – 24 мең сум. Әлеге факт буенча җинаять эше кузгатылган.

Эчке эшләр бүлеге матбугат хезмәте