Лениногорск трамплинчысы Данил Садриев Дөнья Кубогының Швейцария этабында

Берничә көн элек Швейцариянең  Энгельберг шәһәрендә ир-атлар арасында чаңгыда трамплиннан сикерү буенча Дөнья Кубогының бишенче этабы (10-нчы старт) тәмамланды. HS-142 трамплинында узган ярышларда дөньяның  трамплиннан  сикерү элитасы катнашты.  Ярышларның Швейцария этабы , трамплинчылар өчен 29 нчы декабрьдә булачак «Дүрт трамплин турне»сы алдыннан финал сынавы, үзенә күрә бер генераль репетиция булды.  “Дүрт трамплин турне”сы - иң дәрәҗәле  һәм популяр ярышларның берсе, быелгы сезонда 70 еллыгын билгеләп үтә. 

Дөньяның иң яхшы утыз трамплинчысы арасына керүче 18 яшьлек якташыбыз Данил Садриев Энгельбергта ярышларның ике стартында да уңышлы  чыгыш ясады.  Шуның белән үзенең “Дүрт трамплин турне”сына лаек икәнлеген исбатлады.