Салават: "Бөтен әйберләрне урладылар ..."

"Без улым Рөстәм белән ашарга кереп киттек. "Аренда автомобиле" дип язылган машинада бөтен әйбер калды: дүрт чемодан, ике яхшы сумка. Үземнең кулда телефон бар иде, ә Рөстәмдә - зарядка. Мин автоузышчы Тимур Тимерҗановка шалтыраттым. Ул да Барселонада иде. Тимур барысын ташлап, безнең янга килде. Инглиз телен яхшы белә, безнең белән алты сәгать йөрде. Полиция гариза кабул итәргә теләмәде, чөнки безнең кебекләр монда меңләгән икән. Әллә ничә участокта булдык, берсендә көчкә гаризаны алып калдылар", дип сөйләгән ул.
Соңрак Салават Казанга җитәкчелеккә шалтыраткан, алар Мәскәү белән элемтәгә кергәннәр. Мәскәү Барселонадагы Русия Баш консуллыгына чыккан һәм җырчы гаиләсенә Испаниядә йөрү өчен вакытлыча рөхсәт кәгазе биргән. "Консуллыкта да кеше бик күп иде, Барселона кесә караклыгы буенча беренче урында тора икән", дип сөйли артист.
Салават 16 яшьлек улы Рөстәмне Испаниягә автоузышка алып килгән булган. Әмма әлеге хәл аркасында ярышта катнаша алмаганнар, дип яза "Матбугат.ру".
Салават хәзер күбрәк улы белән шөгыльләнүе турында да әйтә. "Рөстәм инглиз телен камил белә, укуы да бик яхшы, 14 яшендә үсмерләр арасында Русия чемпионы булды. Быел 11нче сыйныфны тәмамлый, ярышларда әзрәк катнашыр, БДИ бирәсе бар", ди Салават.
Рөстәмнең машинада әйләнеп капланганы да бар икән, әмма ата бу спорт төре кирәк, ул башкалардан куркынычрак түгел, дип уйлый. Җырчы концерт графигын да Рөстәмнең ярышларына карап кына төзи хәзер. Ярыш көннәре булмаса гына чыгыш ясарга ризалыгын бирә.

https://kiziltan.rbsmi.ru

фото: http://Матбугат.ру