Эшләүче пенсионерлар өчен Яңа ел каникулларының вакытын озайтырга тәкъдим иттеләр

Россия Дәүләт Думасы депутаты Евгений Федоров эшләүче пенсионерлар өчен алда торган Яңа ел каникулларын дүрт көнгә озайту тәкъдиме белән чыкты. Бу хакта RT телеканалы парламентарийның РФ хезмәт һәм социаль яклау министры Антон Котяковка юллаган хатына сылтама белән хәбәр итә.

Үз хатында депутат дөньяда коронавирус пандемиясенең дәвам итүенә, аның нәкъ менә өлкән яшьтәге кешеләр өчен аеруча куркыныч булуына игътибар юнәлткән.

Шул ук вакытта, эшләүче пенсионерлар үз вазифаларын үтәвен һәм даими рәвештә җәмәгать транспортыннан файдалануын дәвам итә, диде Федоров үз мөрәҗәгатендә.

Шуңа бәйле рәвештә, парламентарий хезмәт һәм социаль яклау министрының «хезмәт эшчәнлеген дәвам итүче пенсионерлар өчен, аларга өстәмә дүрт көн ял биреп, алда торган Яңа ел каникулларын 2021 елның 27 декабреннән 2022 елның 9 гыйнварына кадәр озайту мөмкинлеге турындагы мәсьәләне каравын» сорады.

https://tatar-inform.tatar/news/society/26-08-2021/eshl-che-pensionerlar-chen-ya-a-el-kanikullaryny-vakytyn-ozaytyrga-t-k-dim-ittel-r-5835147