Коелган алма әрәм булмасын дисәң

Россия авыл хуҗалыгы үзәгенең  Татарстандагы филиалы җитәкчесе урынбасары Любовь Занина шушы хакта үзенең киңәшләре белән уртаклаша.

Бу өлкәдә белгеч буларак, коелган алмаларны ничек файдалы итеп куллануның кимендә биш төрле ысулы булуын әйтә. Аның беренчесе, алмаларны агачларга черемә ясау өчен, черемә-компост чокырына салырга кирәк, чөнки бу җимешләр чын мәгънәсендә углевод чыганагы. Әмма алма –ул әчкелтем, туфракны да әчетмәсен өчен аны акбур белән эшкәртергә кирәк. 10 кило алмага 100 грамм күләмендә акбур җитә.

Икенче файдалы ысул-алма карлыган, крыжовник куакларына бик кирәкле  ашлама була ала . Моның өчен куаклар утырту өчен чокыр казып, көзен шунда алмаларны салырга, өстен салам, яисә вакланган печән белән каплап, күмеп куярга кирәк.  Ә яз көне шул урынга инде яшь үсентеләр утыртырга була.

Өченче юл – алманы  өстенә 20 сантиметр күтәрелерлек итеп су салып,  әчеп чыкканчы тотарга, аннан кояшлы урынга куеп торырга, ул сыек ашлама булачак. Әмма сибәр алдыннан аңа су кушарга кирәк, чөнки ул бик нык концентратлашкан була.

Шулай ук алмадан коры ашлама да ясап була. Аны вак итеп турап куак төпләренә салу файдалы, бераз тирес белән аралаштырып сибәргә, өстен туфрак белән капларга кирәк.

Коелган алмадан файда күрүнең тагын бер бөтен кеше белгән ысулы- малларга ашату. Аларның төп туклану ризыкларына алма кушу бик файдалы, чөнки алма – маллар өчен дә витаминнар чыганагы ул.