Лениногорскида “Безнең ишегалды” программасы буенча эшләр дәвам итә

Хәзерге вакытта  Лениногорскида ремонт 20дән артык йорт территориясендә башкарыла.

Шунысын әйтеп узарга кирәк, шәһәрдә тулаем бер микрорайоннар төзекләндерелә. Мәсәлән, Шашин, Тукай, Ленин урамнарында берьюлы тугыз йорт ишегалдында эшләр бара.  Болар Шашин урамы 23,25, 25а, Тукай урамы 14,16,16а,18, Ленин проспекты 26,28,30 йортлары.
Бүгенге вакытта монда юллар киңәйтелгән, парковка урыннары булдырылган, яңа тротуарлар җәелгән. Ремонт вакытында казылган урыннарга җир кайтартылган. Ишегалды юлларына асфальт салу эшләре бара.

Шундый ук күләмле эшләр Шашин урамында урнашкан 49,51,53, 53б йортларында һәм Лермонтова 44,46,48 адреслары буенча башкарыла. Биредә дә юлларны киңәйтү, тротуарлар салу, ишегалдына керү юлларын, чүп түгү урыннарын төзекләндерү алып барыла. Асфальт җәелгәннән соң икенче этап булып, урам утларын яңарту, эскәмияләр, чүп савытлары урнаштыру һәм планлаштырган ишегалларында балалар мәйданчыкларын яңарту торачак.