Татарстан синоптиклары көчле җил турында кисәтә

Алдагы тәүлектә Татарстанда көчле җил булырга мөмкин. Бу хакта Татарстан Республикасы Гидрометеорология һәм әйләнә-тирә мохитне күзәтү идарәсе матбугат хезмәтендә хәбәр иттеләр.

«22 майда көндез Татарстан Республикасы буенча урыны белән көньяк-көнбатыштан исүче җилнең тизлеге секундына 16 метрга кадәр җитәргә мөмкин», – диделәр идарәнең матбугат хезмәтендә.

Россия Гадәттән тыш хәлләр министрлыгының Татарстан буенча Баш идарәсендә республика халкын һәм кунакларны көчле җил җитди куркыныч тудырырга мөмкин, дип искәрттеләр. Көчле җил вакытында бик кирәк булмаганда өйдән чыкмаска киңәш ителә. Урамда йорт диварларыннан, юл билгеләреннән, элмә такталардан һәм зур агачлардан ераграк торырга кирәк. Электр тапшыру линияләре астында булу үлем куркынычы тудырырга мөмкин.

Машина йөртүчеләргә торак пунктлардан читкә баруны кичектерү сорала. Сәфәр алдыннан автомобильнең техник торышын тикшерергә, ә трассада хәрәкәтнең куркынычсыз тизлеген сайларга, кискен маневрлардан саклану киңәш ителә.

Бу хакта тулырак: https://tatar-inform.tatar/news/2019/05/21/186670/

фото:pixabay.com