Урдалы урманнарыннан Убырлы карчык чыгып, авылга юнәлде (+фотолар)

Урдалы авылының Яңа ел тамашасына әзерләнгән видеосын карагач, һәркем андагы Убырлы карчыкка ияреп, урманда йөрисе килеп киткәндер. Ә аның Кыш бабай белән Кар кызын очраткач, шатланганын күрсәгез, сез дә сабыйларча куанып, тиздән безгә дә алар килеп җитәчәк бит дип, ышанып та куярсыз. Урдалы авылы мәдәният йорты хезмәткәрләре әзерләгән сюжет буенча, Кыш бабай, Кар кызы һәм Убырлы карчык бергә очрашып, авылга бәйрәмгә юнәләләр.

Ә авылга алар, 29 декабрь көнне кич белән килеп җитәчәкләр, мәдәният йортында күңелле тамаша көтелә. Мәдәният хезмәткәрләре ясап, Урдалы мәдәният йорты инстаграм битенә куйган видео шулхәтле сокландыргыч, күңелле, хәзер нәрсә булыр икән дип, көтеп торасың.

Медицина маскасы һәм куар-код белән керү мәҗбүри булу – бәйрәм кәефен төшермәс, сезгә күңелле яллар, ямьле бәйрәм кичләре телибез. Мәдәният йорты хезмәткәрләре әзерләгән бәйрәмнәр авыл халкы, кайткан кунаклар өчен күңелләренә хуш килер, дип ышанабыз.

Фотолар: авыл мәдәният йортыннан