Татарстанда юл кырыена төшеп киткән “Дэу” машинасының йөртүчесе үлгән

(Казан, 18 июль, “Татар-информ”). Татарстанның Питрәч районында юл кырыена төшеп киткән “Дэу” машинасының йөртүчесе үлгән. Бу хакта “Татар-информ”га Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.

Ашыгыч хезмәтнең 112 бердәм номерына Питрәч-Янсуар автоюлындагы җитди юл-транспорты һәлакәте турындагы хәбәр кичә кич килгән.

“Дэу Нексия”дәге ир-ат идарәне югалткан һәм зур тизлек белән юл кырыена төшеп киткән.

Һәлакәттә машина йөртүче һәлак булган. Ике пассажирны төрле җәрәхәтләр белән Казан хастаханәсенә озатканнар.

Һәлакәт урынына килгән 26нчы янгын сүндерү-коткару часте хезмәткәрләре машинаның аккумляторын сүндергәннәр һәм автомобильдән йөртүченең үле гәүдәсен чыгарганнар.