Лениногорскида югары патогенлы кош гриппы сәбәпле, югары әзерлекле режим кертелде

27 августтан 7.00 сәгатьтән югары әзерлекле режим кертелде.

Кош-корт тотучылар  борчуда. Социаль челтәрләрдә шәһәрдәге Кошчылык фабрикасында чыккан кош гриппы турында фикер алышалар.

Чөнки ветеринар-санитар таләпләр буенча, 5 км радиустагы кош-корт санын юк итү каралган. Лениногорскидан 5 км радиуста Тимәш, Савочкино, Дурасово, Вәли хуторы авыллары урнашкан. Әлеге территорияләрдә карантин: кош-корт сатылмый, сатып алу тыела.

Ветеринария таләпләре буенча, әгәр кошны һәм терлекчелек продукциясен куркыныч зонада калдырсаң , хуҗаның шәхси йорт ишегалдында яңа инфекция чыганагы барлыкка килергә мөмкин. Инфекция йорт кошларына кыргый кошлар  белән контактта булганда, шулай ук һава-тамчы юлы белән күчә.

Кайбер кагыйдәләрне истә тоту мөһим: куллану алдыннан кош ите 70 градустан да түбән булмаган температурада пешерелергә тиеш.  Йомыркаларны 6 минуттан да азрак пешермәскә кирәк. 70 градуста вирус үлә, кош ите продукциясе грипп вирусы белән йогышланган очракта да, җитәрлек күләмдә термик эшкәртелгән продуктлар куркыныч тудырмый.

Чи, чиле-пешле йомырка ашарга, аны пешермичә ниндидер соусларга кушу да ярамый.