Татарстанда вакцинация узмаган мәчет хезмәткәрләре эшеннән читләштерелми

Татарстан мөселманнарының Диния нәзарәте әлегә Covid-19 коронавирусыннан вакцинацияләнмәгән мәчет хезмәткәрләрен эштән читләштерергә планлаштырмый. Бу хакта «Татар-информ» мәгълүмат агентлыгына Татарстан мөфтияте матбугат хезмәтендә хәбәр иттеләр.

Элегрәк Россия мөселманнары Диния нәзарәте рәисе Равил Гайнетдин мәчет хезмәткәрләре өчен яңа чикләүләр кертелү турында хәбәр иткән иде. Аңа буйсынучы мөхтәсибәтләрдә дин әһелләре коронавирустан прививка ясатмыйча эшкә чыга алмаячак, дип хәбәр итте ТАСС.

«Татар-информ» агентлыгы журналистының Татарстанда чикләүләр кертеләчәкме дигән соравына «Әлегә андый планнар юк», — дип җавап бирде Татарстан мөселманнарының Диния нәзарәте вәкиле. «Бу мәгълүматны каян алдыгыз? Без ТР мөселманнарының Диния нәзарәте, ә Россиянеке түгел», — диде ул.

https://tatar-inform.tatar/