Иске Шөгер мәдәният йорты иҗат коллективлары - "Мәдәни мохит"тә

“Төсле җәй” дип аталган күңел ачу программасы “Балерина” фонтаны янында узды. Әлеге чара “Мәдәни мохит” проекты кысаларында оештырылды. Шунысын әйтергә кирәк: бер айлык тәнәфестән соң “Мәдәни мохит” үз эшчәнлеген янәдән башлады, эпидемиологик ситуация белән бәйле рәвештә, июль аенда туктатылып торды.
Узган атнаның шимбәсендә Иске Шөгер мәдәният йортының иҗат коллективы: “Ялкын” хореография коллективы (җитәкчесе – Регина Батырова), Дамир Якупов, Айрат Шәйхлисламов, Эльнара Мирзоева балалар өчен кызыклы уеннар оештырганнар, җырлар, биюләр башкарганнар.

-    “Мәдәни мохит”тә беренче тапкыр гына катнашуыбыз, - дип сөйли Эльнара.  – Бераз дулкынландык. Безне бик җылы каршы алдылар. Программа белән шулхәтле мавыгып киттек, вакытның узганы да сизелмәде, - ди ул.

Фонтан янына җыелган балалар өчен конкурслар, викториналар уздырганнар. Иң кызыгы – “Аш пешерүчеләр-кондитерлар” уены булган. Монда чын-чынлап кулинария эшенә керешкәннәр балалар. Ике официант чарага килгән халыктан заказлар җыйган. Аш пешерүчеләр исә өстәл куеп, шунда печеньеларга төрле эчлекләр ясаган, татлы ризыклар әзерләгән. Әлбәттә, халыкны да сыйлаганнар.