Лениногорскида автода күп төр ярышның муниципаль этабы узды

16-17 яшьлек яшүсмерләр ярышка ныклап әзерләнгән. Башта алар компьютерда тест сорауларына җавап бирде. Икенче этапта автомобильне йөртү осталыгын күрсәтте. Эстакада, змейка, гаражга керү, параллель парковка – барысын да үтәделәр.

Конкурста катнашучы Адилә Рәшитова 16 яшендә автомобильгә рульгә утырган. Мәктәп укучысы булса да, машинаны да яхшы йөртә, техниканы да белә. Еш кына әтисе белән гаражда булалар, өйрәнә, кызыксына. Язын Адилә имтихан тапшырачак, ә машина йөртү хокукы документын 18 яшь тулгач алачак.

“Быел автода күп төр ярышлар дәүләт автомобиль инспекциясенең 85 еллыгына багышлана. Конкурста Лениногорск мәктәпләренең автоклассларында укучы 14 яшүсмер катнашты”, - ди “Юл хәрәкәте куркынычсызлыгы” учреждениесенең профилактика бүлеге җитәкчесе Зөлфия Рахманова.

Зональ ярышлар Әлмәттә була. Анда өч Лениногорск укучысы катнашачак.

Фотолар: Наталья Лакомкина