Лениногорск районы Казанда уникаль мәдәни күптөрлелеген тәкъдим итәчәк

Чара Халыклар дуслыгы йортында узачак.

Кунаклар өчен бай программа – күргәзмәләр, балалар һәм олылар өчен мастер-класслар, республикада Милли мәдәниятләр һәм традицияләр елына багышланган концерт әзерләнгән.

Моннан тыш, чарага килүчеләр  Лениногорск районында кадерләп сакланган һәм популяр булган милли ризыклар белән танышачак. Күргәзмә һәм интерактив программа 31 мартта 11.00-14.00 сәгатьтә Татарстан Халыклар дуслыгы йорты холлында уза. Концерт программасы 14.00 сәгатьтә башланып 15.30 сәгатькә кадәр дәвам итәчәк.

Үзәкләштерелгән китапханә Татарстан әдәбиятын үстерүгә сизелерлек өлеш керткән Лениногорск районы шагыйрьләре һәм язучыларының (Габдерәхим Утыз Имәни, Гәрәй Рәхим, Шамил Бикчурин) әсәрләре, шулай ук Лениногорскида гына түгел, аннан читтәге укучыларга да таныш булган бүгенге көн язучылары һәм шагыйрьләренең китапларыннан торган күргәзмә тәкъдим итәчәк.

фото: "Лениногорск-информ"