Лениногорскилы пенсиясен яңадан исәпләп акчасыз калган

Чираттагы лениногорскилы мошенниклар «кармагына» эләккән. Әлеге ир-атка таныш булмаган кеше шалтыраткан, үзен Дәүләт хезмәтләре порталы хезмәткәре дип таныштырган һәм пенсиясен кире исәпләргә Пенсия фонды бүлегенә барырга кирәклеген хәбәр иткән. Кабул итүгә язылу өчен порталда килгән кодларны әйтергә кушкан.

Шалтыратучы ир-атка барлык булган акчаларын «куркынычсыз счетка» күчерергә тәкъдим иткән. Билгеле инде, ир-ат ышанган. Нәтиҗәдә, ир-ат мошенниклар счетына 438 мең сум акчасын күчергән.

Соңрак ул, үзенең мошенниклар корбаны булуын аңлап, полициягә мөрәҗәгать иткән. «Мошенниклык» маддәсе буенча җинаять эше кузгатылган.

Лениногорск Эчке эшләр бүлеге кисәтә:

Махсус «куркынычсыз» счетлар юк. 

Акчаларны «куркынычсыз счетка» күчерү тәкъдимен бары тик мошенниклар гына куллана.