Трактор алам дип ярты млн сум акчасын югалткан

Трактор сатып алырга җыенган казанлы ярты миллион сумга якын акчадан колак каккан.

16 нчы мартта «Юдино» полиция бүлегенә 35 яшьлек ир-ат мөрәҗәгать итә. Ир 3 нче мартта авыл хуҗалыгы техникасын сату сайтында трактор сату турында белдерү тапканын сөйли. Менеджер белән шалтыратыша, товарның сатуда булуын раслыйлар һәм түләү өчен счет реквизитлары бирәләр. Сату-алу килешүен төзеп, акчаларны алдан бирелгән счетка күчерә, әмма сатучы компаниядән трактор җибәрү турында мәгълүмат килми. Моннан тыш, сайтта телефон номерлары да алышына.

Зыян күрүче матди зыянны 478 мең сумга бәяләгән. «Юдино» полиция бүлегендә җинаять кылуга катнашы булган затны ачыклауга юнәлдерелгән чаралар комплексы үткәрелә. Җинаять эше кузгату мәсьәләсе хәл ителә, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Мошенниклык очраклары ешаюга бәйле рәвештә, Россия Эчке эшләр министрлыгы халыкны игътибарлы булырга чакыра. Телефоныгызга шалтыратып туганнарыгыз турында мәгълүмат җиткерүче билгесез затларга ышанырга ашыкмагыз. Банк картасыннан акча урлау очракларын булдырмас өчен, счетның торышы турында хәбәр итә алган бердәнбер оешма – аңа хезмәт күрсәтүче банк икәнен истә тотарга кирәк. Әгәр карта белән ниндидер операцияләр уздыралар дигән шик бар икән, әгәр дә аның блокировкалау турында СМС-хәбәр килгән икән, кичекмәстән банкка мөрәҗәгать итәргә кирәк. Банкның клиент хезмәте телефоны, гадәттә, картаның икенче ягында күрсәтелә.  СМС-хәбәрдә күрсәтелгән номерларга шалтыратып, хәбәр юлларга кирәкми, моның өчен өстәмә түләү алынырга мөмкин.

http://shahrikazan.ru/news/kyiskacha-ya%D2%A3alyiklar/traktor-alam-dip-yarty-mln-sum-akchasyn-yugaltkan

https://pixabay.com/ru/