Илфак истәлегенә якташыбыз Рәмзия Габделхакова шигырь язган

Синең тормыш шоу-тамаша булды…
Гөнаһлы уй: үлемең дә бәлкем?!
Хәбәр килде: Илфак китеп барган...
Тагы ПИАР?! Ышанмады беркем.

Көннәр күргән синең елмаюны,
Төннәр йоткан бәгырь яшьләрен...
Сорадыңмы син дә соң мизгелдә:
Мин бу җирдә нигә яшәдем?!

Синең тормыш шоу-тамаша булды...
Шыр ялангач иде күңелең.
Кисәтмәгән тәңрең һәр бәндәгә
Ышанырга кирәк түгелен.

Җирдә табалмаган тынычлыкны
Мәңгелектә бәлки табарсың…
Фәрештәләр, зинһар, юатыгыз
Җирне сөйгән күкләр баласын.

Рәмзия Габделхакова