Лениногорскиның күп балалы Никифоровлар гаиләсе республика Президенты белән очрашты

Шәһәребездә яшәүче күп балалы Никифоровлар гаиләсе шушы көннәрдә республика Президенты Рөстәм Миңнеханов белән очрашуда булып кайтты.

Мондый тантаналы чара Президент Рөстәм Миңнеханов һәм хатыны Гөлсинә Әхәтовна тарафыннан ел саен үткәрелә. Очрашуда республиканың төрле районнарыннан 51 гаилә катнашты.

- Без гаиләләребез белән горурланабыз, алар нык һәм тагын да күбрәк булсын өчен күп көч куябыз, - диде республика лидеры.

Әлеге тантанада катнашкан лениногорскилы Валерий һәм Әлфия Никифоровлар гаиләсе утыз елдан артык бергә. Алар үзләренең дүрт баласын тәрбияләп, тагын сигез баланы гаиләләренә кабул итеп алдылар.

- Безнең өчен гаилә - бик кадерле. Без 12 бала һәм сигез онык тәрбиялибез. Аларның һәрберсен яратып, җәмгыятебезнең лаеклы кешеләре булсыннар, дип үстерәбез, - ди гаилә башлыгы.