"Омикрон" килгәнче өлгерергә кирәк, ди Лениногорск баш табибы

Аның әйтүенчә, яңа ел алдыннан, яңа ел бәйрәмнәрендә коронавирус буенча ситуациядә әллә-ни үзгәреш юк, хәл тотрыклы.

Провизор госпиталендә коронавирус һәм вируслы пневмония белән авыручы 20гә якын лениногорскилы медицина ярдәме ала. Баш табиб сүзләренчә, риск төркемендә олы яшьтәгеләр, 60 яшьтән олырак булган лениногорскилылар. Хастаханә койкасында ятучыларның барысы да коронавируска каршы прививка ясатмаган, ди Рим Әмиров.  Аның әйтүенчә, авылларда яшәүчеләр күбесе вакцинация алган, авыл халкы бу яктан шәһәрдәгеләргә караганда активрак булган.

Гомумән, 60 яшьтән олырак булган 19 мең 325 кешенең 11 мең 300е прививка алган, бу 58,4 процент тәшкил итә. Әле прививка аласы кешеләр –  шактый.

Баш табиб Рим Әмиров сүзләренчә, яңа омикрон-штамм тиз таралучан. Чит илләрдә, АКШта, Бөекбританиядә яшен тизлегедәй таралды, Россиягә килеп җитте. Омикронны “йөгәнләр” өчен вакцина ясатырга кирәк. Халык арасында таралган фейкларга ышанырга кирәкми, дигән фикерен җиткерде баш табиб.

Вакцинация пунктлары: “Шифа” сәүдә үзәгендә, үзәк район хастаханәсе поликлиникасы һәм медсанчасть поликлиникасы, Иске Куак, Шөгер участок амбулаторияләре. Моннан тыш, олы яшьтәге, аз мобильле гражданнар янына өйгә килеп тә прививка ясау дәвам итә. Мондый гамәл узган ел декабрь аенда оештырылган иде инде.
-    Вакцинация узу пунктларында «Спутник V», «Спутник-Лайт», «ЭпиВакКорона», «КовиВак» вакциналары бар. Хәзер безне “омикрон”нан аерып торучы ике-өч атна вакыт бар. Әлеге вакытны прививкага багышларга кирәк, - ди Рим Рифович.

13 гыйнварга булган мәгълүматка караганда, Лениногорскида 38 мең 400 кеше прививка ясаткан. Эпидемия башланганнан бирле  ковидның 520 очрагы ачыкланган.