Вандализм: яшүсмерләр шәһәр күле янындагы плитәләрне каерып алган

Күптән түгел Лениногорск пабликларының берсендә күпләрдә ризасызлык уяткан видео барлыкка килде: анда  берничә яшүсмер түбән сулык янындагы плитәләрне каерып алалар да суга ыргыталар.

Администрациягә әлеге урынны янәдән төзекләндерергә туры киләчәк. Ярый алар төзекләндерерләр, ә менә яшүсмерләр тагын башка җирдә җимерүләрен дәвам итәрме?

Администрация вәкилләре шәһәрнең төзеклеген җимерүче яшүсмерләрнең әти-әниләре мэриягә мөрәҗәгать итәрләр дип көтә. Әгәр шулай булмаса, шәһәр җитәкчелеге кырыс чаралар кулланачак. Администрация  полициягә дә хәбәр итмәгән әлегә. Әмма гаеплеләр пәйда булмаса, хокук сакчылары бу эшкә алыначаклар.