Таһир Шәмсуаровтан шаян шигырь

Төркиягә сәяхәт

Өч дус- сыер, эт һәм әтәч

Үрнәк хезмәт иткәннәр.

Туристик юллама белән

Төркиягә киткәннәр.

Санаулы көннәр тиз уза

Монысы хак әлбәттә.

Бер ай буе ахириләр

Яшәгәннәр җәннәттә.

Ресторанда типтергәннәр,

Пляжда кызынганнар.

Туган-тумача, дус-ишкә

Күчтәнәчләр алганнар.

Китәр көнне кан кардәшләр

Озатырга килгәннәр.

Теләсәгез бөтенләйгә

Калаласыз дигәннәр.

Сыер әйткән: "Мин Рәсәйгә

Кайтып тормам, балалар.

Ашарга юньле азык юк,

Көне-төне савалар".

Эт тә ризалык биргән ди,

Монда дөнья күрергә.

"Бар да урлый, шуңа күрә

Белмим кемгә өрергә".

Әтәч исә "Кайтам дигән,

Мине Рәсәем тарта.

Кычкырган саен бит анда

Дәрәҗә-даның арта"

Өч җан дусның сәяхәте

Әнә шулай беткән ди.

Өч борынга берне салгач,

Әтәч кайтып киткән ди.

Таһир Шәмсуаров