Япониядә карбызны 450 мең сумга саталар

Япониядә "Дэнсукэ" сортлы карбызларны сату буенча беренче аукцион үткән. Бу сортның төп үзенчәлеге шунда:  аның кабыгы - кара, ә эче янып торган кызыл төстә, төшләре бик аз, ә тәме искиткеч икән.  Әйткәндәй, бу илдә элита сортлы, кыйммәт җиләк-җимешләрне аукционга чыгарып сату традициясе күптән килә.

11 килограммлы "кара" карбыз Асахикава шәһәрендә үткән аукционда сатылган һәм ул 7,2 мең долларга сатылган. Безнеңчә, ул якынча 450 мең сум була.  Карбызны супермаркет хуҗасы Кэйити Судзуки дигән кеше сатып алган. "Аукционда җиңү - быел бизнесымның уңышлы булачагына ишарә. Сату яхшы китәчәгенә ышанам" - дигән ул.

Кара төстәге карбызларны үстерүче Хоккайдо фермерлары белдерүенчә, быел әлеге җиләкләрне үстерү өчен һава торышы бик яхшы торган, алар аеруча татлы булып үскән. Аларны кибетләргә күпләп чыгару июль аенда башланачак. Җимешләрнең һәркайсы 80-100 долларга сатылачак. Безнең акча белән әйткәндә, бер карбыз ким дигәндә 5 мең сум торачак.

Фото: ovosheved.ru

https://kiziltan.rbsmi.ru