Җырлыйбыз да, биибез без, «Аулак өй» кичәсендә...

---

Өстәл тирәсенә ашыгуыбыз тамак ачыкканнан түгел, әлбәттә: "Заман сулышы" газеты редакциясе исеменнән конкурста җиңүчегә бүләк алып килгән идек. Шуңа тизрәк күрәсе килә. Алдыбызга бик тә җаваплы бурыч куелды: ашап карамый гына хуҗабикәләрнең эшләренә бәя бирергә. Өч кеше бавырсак, берсе чәкчәк, бер апа пирог пешереп килгән. Барысы да аппетитлы, матур итеп бизәлгән. Бөтенесенә беренче урын бирсәң дә, ялгышмабыз кебек. Тик конкурс - конкурс бит инде, Мәдинә апа Сафиуллина да "Ягез, кызлар, сайлагыз" дип, яныбызда басып тора. Иң беренче булып, чәкчәккә күз төшкән иде. Ул үзенчәлекле итеп пешерелгән, гадәти - түгәрәк түгел, ә токмач формасында пешерелеп, матур итеп катырылган. Беренче урынга дип, шуны сайладык та, урыныбызга барып утырдык. Чөнки бүләкләү кичә ахырында булачак.

Кеше килә дә килә. Юри санап утырабыз, алтмыштан артып китте.