11нче ТОСС Әниләр көне уңаеннан чара үткәрде (ФОТОлар)

Шәһәребезнең үзәк китапханәсендә Әниләр көненә багышланган кызыклы чара узды. Аны унберенче территориаль җәмәгатьчелек үзидарәсе оештырды. Бәйрәм түрендә иң кадерле кешеләребез - әниләр булды.

Чарага әлеге микрорайонда яшәүче, 11 нче ТОСС тормышында актив катнашкан хатын-кызлар, күп балалы аналар чакырылган иде. Бәйрәмдә "Логос" психологик ярдәм күрсәтү үзәге вәкилләре дә катнашты.

- Күңелебез тыныч булганда гына без үзебезне, чын мәгънәсендә, бәхетле итеп хис итә алабыз. Хатын-кыз - гаилә учагын саклаучы изге зат. Гаиләдә, балалар тәрбияләүдә кыенлыклар килеп чыкканда да без, әниләр, авырлыклар алдында сыгылмыйча, көчле булып калырга тырышабыз, - дип башлады сүзен "Логос" психологик ярдәм күрсәтү директоры Ольга Ященко. "Нәрсә ул хатын-кыз бәхете? Күңел тынычлыгын ничек табарга?" дигән сорауларга җавапны бергәләшеп эзләделәр. Бу темага кыгылышлы лекцияне дә хатын-кызлар кызыксынып тыңлады.

Бәйрәмгә килүчеләр әниләр тренинг үтте: үзара танышып, бергәләшеп төрле биремнәр дә үтәде.

Чарада барлык әниләр дә актив катнашты, бер-берләренә матур теләкләрен кызганмады алар. Бәйрәмнең азагында 11нче ТОСС рәисе урынбасары Лиана Габидулина бүләкләр тапшырды. " Бәхетле аналар булып, киләчәктә балалар-оныкларыгызның хөрмәтен күреп яшәргә язсын, - дип теләде ул.

Чарада Зилә Мөдәррисова булып кайтты

автор фотолары