Соңгы елда Татарстанда кыргый җәнлекләр саны арткан

Соңгы елда Татарстанда кыргый җәнлекләр саны арткан: тимгелле болан – 39,4 процентка, себер кыр кәҗәсе – 7,9 процентка, байбак – 6,5 процентка, затлы болан – 6,3 процентка, поши – 2,6 процентка.

Бу хакта бүген Дәүләт Советында Экология, табигатьтән файдалану, агросәнәгать һәм азык-төлек сәясәте комитеты һәм комитет каршындагы эксперт советының уртак утырышында билгеле булды. Татарстанның Биологик ресурслар буенча дәүләт комитеты рәисе урынбасары Рамил Шәрәфетдинов хайваннар дөньясы объектларын һәм аларның яшәү тирәлеген саклау, торгызу һәм файдалану өлкәсендәге мөнәсәбәтләрне җайга салу турында докладын тәкъдим итте. Утырышны комитет рәисе урынбасары Нәҗип Хаҗипов үткәрде.

Рамил Шәрәфетдинов республикада аучылык җирләренең мәйданы 6,3 мең гектар тәшкил итүен әйтте. Соңгы елда кыргый хайваннар саны арткан.

«Җәнлекләр саны артуга саклау һәм биотехник чаралар йогынты ясый. Әйтик, хайваннарга яшәү өчен уңайлы шартлар булдыру максатыннан комитет хезмәткәрләре һәм аучылар биотехник корылмалар төзи, кыргый хайваннарны ел әйләнәсе тукландыра. 2025 елда барлыгы 3 меңнән артык биотехник корылма төзекләндерелде һәм торгызылды, шул исәптән кыр кәҗәләре, пошилар һәм куяннар өчен 800дән артык тозлык, терлекләр өчен 300дән артык җимлек, кошлар өчен 600дән артык ясалма оя булдырылды», – диде Рамил Шәрәфетдинов.

Кыргый хайваннарның саны арту нәтиҗәсендә республикада яшәүчеләрнең аулау мөмкинлеге дә арта. 2025 елда аучылыкка 41 мең рөхсәт бирелгән. Бу узган ел белән чагыштырганда 3 процентка күбрәк. Биш елда аучылыкка бирелгән рөхсәтләр саны 22 процентка арткан. «Бу – күбрәк куяннар саны һәм аучылык җирләре артуы белән бәйле», – дип сөйләде Рамил Шәрәфетдинов.

Табигатьне саклау чаралары турында сөйләгәндә, Рамил Шәрәфетдинов 2025 елда биоресурслар буенча республика комитеты хезмәткәрләре күчмә тикшерү барышында 1,6 мең административ хокук бозу очрагын ачыклады, 50 җинаять эше ачылды, дип билгеләп үтте.

https://tatar-inform.tatar