Бала куркып калдымы? Нинди дога укырга соң?

Укучыбыздан килгән әлеге сорауга Кабан арты мәчетенең икенче имамы Сәлимҗан хәзрәт Домнин җавап бирә:

–    Беренчедән, мөселман кешесе күңеленә нинди генә курку кермәсен, Аллаһ Тәгалә ул куркуны бетерергә кодрәтле икәненә ышанырга һәм балаларын да шуңа өйрәтергә тиеш. Нинди генә курку-авырлык килмәсен, Раббыбызда сыену табарга кирәк. Икенчедән, күңелгә шом кергәндә, түбәндәге догаларны кылсагыз, иншаллаһ, Аллаһ Раббыбыз тынычлык бирер:
"Әгүзү билләһи минәшшәйтанирраҗим" кәлимәсен әйтү;
“Аятел-көрси”;
“Бәкара” сүрәсенең соңгы ике аяте ("Әмәнәррасүлү...");
“Ихлас” (Көлһүәлла), “Фәлакъ” һәм “Нәс” сүрәләрен уку;
Көне саен иртән һәм кичен өч тапкыр: "Бисмилләһилләзи лә ядурру мәгасмиһи шәй`үн фил-арды вә лә фиссәмә вә һүәссәмигул-галим";
Көн саен иртән һәм кичен өч тапкыр: "Әгүзү би кәлимәтилләһит-тәммәти мин шәрри мә халякъ".
Аллаһ Тәгалә үзегезне, балагызны һәм барчабызны бәла-казалардан имин кылсын, күңелләребезгә тынычлык бирсен!

http://shahrikazan.ru/news/sorau-avap/kurkulyktan-nindi-doga-ukyrga-ikn

https://photo.tatar-inform.ru/