Лениногорск районының шәхси хуҗалыклары ни хәлдә?

 Авыл хуҗалыгы идарәсеннән алынган мәгълүматка караганда, Лениногорск районында 10 мең 663 шәхси ярдәмче хуҗалык исәпләнә (мәгълүматлар 2022 елның 1 гыйнварына), узган елның шул чоры белән чагыштырганда, 21 шәхси хуҗалыкка кимрәк.

Шәхси хуҗалыкларда мөгезле эре терлек, сыер, сарык-кәҗә, ат (бик сирәк кенә) асрыйлар, кош-корт, бал кортлары тоталар.

Авыл хуҗалыгы идарәсеннән алынган  мәгълүматка караганда, шәхси хуҗалыкларда сыер башы күп түгел, быелның 1 гыйнварына - 1 мең 48 баш. Узган елның 1 гыйнварына 1 мең 162 баш булган, 2021 елның 1 гыйнварына – 1 мең 192 баш.
Быелгы мәгълүматлар буенча карасак, иң сыерлы авыллар – Урмышлы (94 баш), Писмән (92 баш), аннан соң Яңа Иштирәк (85 баш) һәм Керкәле (79 баш), Куакбашта – 73 баш сыер.

Гомумән алганда, Урмышлы авылында шәхси хуҗалыкларда барлык малларны да күпләп асрыйлар. Әйтик, мөгезле эре терлек – 219 баш, бу барлык авыллардан да иң югары күрсәткеч. Урмышлыда шәхси хуҗалыкларда 511 баш сарык асрыйлар, бал кортларын да күпләп тоталар монда. Сарыклар Писмәндә – 245, Сарабикколда – 184, Керкәледә – 183, Куакбашта – 181, Яңа Иштирәктә – 167, Мичурин, Зеленая Рощада – 128-127.

Ә менә авылларда кош-корт асрау буенча күрсәткечләр төрле. Иң күп кош-кортлы авыл – Мичурин, монда 1 мең 885 баш кош-корт исәпләнә. Аннан Сарабиккол авыл җирлеге, биредә – 1 мең 498 баш, Иске Куакта – 1 мең 290, Иске Шөгердә – 1 мең 251 баш. Яңа Иштирәк белән Түбән Чыршылыны да кош-кортны күпләп асраучылар рәтенә кертергә була, 1 мең 230 һәм 1 мең 110 баш.

Районыбыз авыл җирлекләрендә шәхси хуҗалыкларда куяннар да асрыйлар, Тимәштә – 143 баш, Урмышлыда – 128, Ивановкада – 92 баш.

Авылларыбызда уңган-тырыш хуҗалыклар бал кортлары да тота, иң күп асраучы Урмышлы дип яздым. Аннан кала Куакбаш (426), Иске Шөгер, Иске Куак, Зәй-Каратай, Түбән Чыршылы – “баллы”.

фото: https://tatar-inform.tatar/