Артем Вагиз улы Мурасов

Заман сулышы, 15 апрель 2024 - 08:42

Артем Чимкент өлкәсенең Кентау шәһәрендә туган. Гаилә Лениногорск районының Ивановка авылына күчеп килгән. Артем Ивановка урта мәктәбен тәмамлый, Лениногорск нефть техникумында укый.

2009 — 2010 елларда Артем армиядә хезмәт үтә. 2022 елның 28 октябрендә 41869 хәрби частенә мобилизация буенча хәрби хезмәткә чакырыла. 2024 елның 14 мартында махсус хәрби операция бурычларын үтәгәндә һәлак була.

Артемны соңгы юлга озату мәрасимендә дуслары арасыннан Николай Ярков аның турында: «Артем минем иң якын дустым, абыем кебек иде. Кыю, теләсә кайсы минутта мохтаҗларны якларга әзер иде. Шул ук вакытта бик талантлы да, матур җырлый һәм гитарада уйный иде. Без аның белән вахтада йөреп эшләдек. Иркутск шәһәренә эшкә барганда дүрт тәүлек буе ике яңа җыр өйрәндек, алар безнең өчен гимн булды. Җырлар, әлбәттә, мәхәббәт турында. Артем кыска вакытлы ялга кайткач та җырлаган идек. Ул чагында бөтен авыл балаларын җыйды Артем, тәм — томнар өләште, сугыш һәм анда ничек көннәре үтүе турында сөйләгән иде», — дип искә ала Николай.