Августта һава торышы нинди булыр?

Быел җәйнең соңгы аенда һава торышы кискен үзгәрешләрсез, синоптик нормалар чигендә киләчәк дип көтелә. Бакчачылар һәм ял итәргә планлаштыручылар өчен әйбәт яңалык: артык кызу да, туктаусыз яуган яңгырлар да фаразланмый.

Айның беренче яртысы җылы һава торышы белән куандырачак. Бу көннәрдә термометр баганасы көндез +23...+27°C, төннәрен исә +15...+20°C тирәсе күрсәтәчәк.

Августның икенче яртысында инде төбәктә көз сулышы сизелә башлаячак. Ай ахырына таба көндезге һава температурасы +18...+21°C га кадәр төшәчәк, ә төннәрен җылылык +12...+15°C дәрәҗәсеннән артмаячак.

Август аенда кояшлы көннәр шактый күп булачак — ай дәвамында якынча 10-11 көн тулысынча аяз һава торышы көтелә. Шул ук вакытта, кыска вакытлы яңгырлар да күзәтеләчәк: айның якынча 10 көнендә явым-төшемнәр булуы ихтимал. Салкынча җилләр көчәя төшсә дә, гомумән алганда, август ае уңыш җыю һәм кышка әзерлек өчен бик кулай киләчәк.

 https://shahrichalli.ru/news/kich-bgen-irtg/avgustta-hava-torysy-nindi-bulyr

фото: редакция архив