КНИТУ-КАИның Лениногорск филиалын тәмамлаган егет-кызлар диплом алды

Чыгарылыш студентлар арасында 130 бакалавр һәм 24 магистр. Алар — киләчәктә икътисад, менеджмент, мәгълүмат системалары һәм IT-технологияләр буенча белгечләр.  Чыгарылыш укучыларын котларга Лениногорск районы башлыгы Рәгать Хөсәенов та килгән иде. 

«Безнең филиал өчен күңелдә горурлык бар. Анда безнең балалар, шәһәр һәм районда яшәүче егет-кызларыбыз, чит шәһәрләрдән килгәннәр дә укый. Каядыр китәсе, торакка акча сарыф итәсе түгел. КНИТУ-КАИ дипломнары булган белгечләр һәрвакыт кирәк», — диде ул. 

Чыгарылыш укучыларына КНИТУ-КАИның Лениногорск филиалы җитәкчесе Рәсим Шәмсетдинов та җылы котлауларын җиткерде. 

14 чыгарылыш укучысы аерым дипломга ия булды. Алар арасында — Регина Гыйләҗетдинова — булачак икътисадчы.

«Диплом язганда, мәгълүмат эзләүдә кыенлыклар булды, ләкин мин барысын да таптым. Яздым. Көтелгән Дипломымны, ниһаять, кулыма алдым», — ди ул.

Соңыннан, КНИТУ-КАИ гимны яңгырады. Чыгарылыш студентларын алда яңа ачышлар һәм зур тормыш көтә.

Фото: Асия Мәхмүтова