Лениногорскилы электр счетчигын алыштырырга уйлап акчасыз калган

Лениногорск Эчке эшләр бүлегенә 1950нче елгы хатын-кыз мөрәҗәгать итә. Гаризадан күренгәнчә, аның телефон номерына таныш булган номер шалтырата. Трубканың икенче ягында булган кеше үзен «Энергосбыт» хезмәткәре дип таныштыра. Сөйләшә торгач, ул 74 яшьлек хатын-кызның электр счетчигын куллану буенча килешүнең вакыты чыга, яңа счетчик  куярга кирәклеге турында әйтә. Билгеле инде, хатын-кыз аның сүзләренә ышана.

«Мошенник» аның телефонына сылтама (ссылка) күрсәтелгән смс-хәбәр җибәрә, хатын-кыз ссылка буенча яңа килешү белән танышыр өчен керә. Сылтама буенча кергәннән соң бераз вакыттан  банк картасыннан 45 мең сум акчасы  юкка чыга. Хатын-кыз мошенниклар корбаны булуын аңлагач, Лениногорск Эчке эшләр бүлегенә хәбәр итә. 

Лениногорск Эчке эшләр бүлеге кисәтә:

электр энергиясен исәпкә алу приборлары сафтан чыкканда, эксплуатация срогы беткәндә аны алмаштыру һәм урнаштыру кулланучы өчен бушлай. Алдана күрмәгез!