Раил Гыйззәтуллин якташларына иң матур җырларын бүләк итәргә әзерләнә

Районыбызның Иске Шөгер авылында туып-үскән Раил – мәктәп елларыннан ук сәхнәдә. Ул әле балалар бакчасына йөргәндә тәрбиячеләр өйрәткән җырларны эченнән генә көйләп йөргән. Ә җырга-моңга тартылуын мәктәптә җыр укытучысы Гөлнара Вафина күреп ала. Үсмер чагыннан ук аны туйлар алып барырга чакыра торган булганнар. 

Мәктәптән соң шәһәрдәге педагогия училищесында педагоглары: Рәмзия Галимова, Надежда Ермолаева шулай ук егетнең өметле җырчы икәнен сизеп алалар. Ул мондагы “Елмай” вокаль ансамбленә йөри башлый.  Раил укытучыларына һәм педагогларына рәхмәтле.

Үзенең беренче шәхси концертын ул  училищеда укыганда, студент чагында куйган. Армиядән хезмәт итеп кайткач, предприятиеләрдә эшләгәндә дә җыр-моңнан аерылмый. Лениногорск Мәдәният сарае сәхнәсендә концертлар куя, районыбыз авылларына да гастрольләргә чыга.

Иҗатында иң югары күтәрелеш – аның 35 яшендә булгандыр. Раил хыялын чынга ашыра: Казан сәхнәсендә үз концертын куя. Узган елның 26 ноябрендә башкалабыз “Чулпан” мәдәният үзәгендә шаулап-гөрләп концерты үтә. Лениногорскидан концертка баручылар, концертны караучылар фикерләрен җиткергән иде ул чакта. Иске Шөгер авылы башлыгы  Лилия Шиһапова авылдашының концертын күреп, хозурланып кайткан иде.

Концерт барышында Раил Гыйззәтуллинның телебезне, мәдәниятебезне үстерүгә, татар җыр сәнгатенә керткән өлешен югары бәяләп, Татарстан Мәдәният министрлыгының “Мәдәнияттәге казанышлар өчен” күкрәк билгесе тапшырылды. Гади авыл егетенең 35 яшендә шулай зур сәхнәләрне яулавы бары хөрмәткә һәм мактауга лаек. Тырышлыгы, үҗәтлеге белән зур сәхнәгә менде.

“Эх, ул чакта концертны карый алмыйча калдык”, дип борчылган Лениногорск тамашачысына сөенечле хәбәр: Раил башкалада 35 яше уңаеннан узган концертын якташларына 22 апрельдә, 19.00 сәгатьтә Лениногорск мәдәният сарае сәхнәсендә тәкъдим итәчәк.

“Үземнең туган ягымның халкы, дусларым, туганнарым, бергә эшләгән коллегаларым, иҗатташ дусларым белән концертымны бүлешәсем килә. Концертта тагын менә берничә елдан бирле хезмәттәшлек итүче якташыбыз – Люция Мусина, Алия һәм Фәнис Кәлимуллиннар булачак. Регина Гыйззәтуллина җырларын бүләк итәчәк. Ә баянда алыштыргысыз гармунчы –  Рөстәм абый Идиятов”, - ди Раил булачак концерт турында.

 Димәк, ул лениногорскилыларны якын итеп, сагынып кайтып, иҗатташ дуслары белән ямьле концерт куячак икән, шәһәр һәм райондашлар да җавапсыз калмас. Концертта очрашканчыга кадәр.

фото: Раил Гыйззәтуллин шәхси архивыннан