Татарстан Рәисе: Республиканың елга инфраструктурасы мөмкинлекләрен күбрәк файдаланырга кирәк

Чара «Казан Экспо» да Татарстан Республикасы Транспорт һәм юл хуҗалыгы министрлыгының йомгаклау коллегиясе кысаларында узды.

Модератор булып республиканың транспорт һәм юл хуҗалыгы министры Фәрит Хәнифов чыгыш ясады. Эштә шулай ук Бурятия Республикасы башлыгы, «Нәтиҗәле транспорт системасы» юнәлеше буенча Дәүләт Советы комиссиясе рәисе Алексей Цыденов катнашты. 

Рөстәм Миңнеханов билгеләп үткәнчә, бүгенге көндә республика икътисады үсеше өчен логистик чылбырлар санын арттыру мөһим. "Республиканың елга инфраструктурасы потенциалыннан мөмкин кадәр күбрәк файдаланырга, гамәлдәге порт һәм причал инфраструктурасын торгызырга, шулай ук заманча таләпләргә туры китереп яңа объектлар төзергә һәм мультимодаль логистиканы гамәлгә ашыру өчен аларны автомобиль һәм тимер юл юллары белән җиһазларга кирәк", - дип ассызыклады Татарстан Рәисе. 

Ул билгеләп үткәнчә, Татарстан елгаларының суднолар йөреше Балтыйк диңгезеннән Каспий һәм Кара диңгез бассейннарына кадәр йөк ташуны тәэмин итә ала, шул исәптән «Төньяк – Көньяк» халыкара транспорт коридоры буенч да. 

Шул ук вакытта Россия һәм халыкара транспорт коридорлары кысаларында республикада йөк ташуның мультимодаль логистикасын үстерүдә тимер юл мөһим роль уйный. "Татарстанның җитештерү куәтләренең перспективалы үсешен исәпкә алып, „Россия тимер юллары“ компаниясе белән берлектә республиканың логистик үзәкләренә бәйле электрлаштырылган тимер юл инфраструктурасын үстерү мәсьәләсен карарга кирәк", - диде Рөстәм Миңнеханов. 

Республика Рәисе 2024 елда файдалануга тапшырылган Свияжск төбәкара мультимодаль логистик үзәген уңай мисал итеп билгеләп үтте. Ул «Төньяк – Көньяк» һәм «Европа – Көнбатыш Кытай» халыкара транспорт коридорлары киселешендә урнашкан, федераль тимер юлларга һәм автомобиль юлларына чыгуы, шулай ук Россиянең Европа өлешендәге бердәм тирән су системасы аша өч диңгезгә чыгу юлы бар. 

Рөстәм Миңнеханов ассызыклаганча, федераль хакимият органнары белән берлектә, барлык төр транспорттан файдаланып, йөк ташуны үстерү максатында үзгәрешле тариф сәясәтен эшләү мөмкинлеген карарга кирәк, шул исәптән су транспортында йөк ташуны арзанайту, судно йөрешләренең гарантияләнгән габаритларын саклау һәм елга флотын төрле билгеләнештәге заманча йөк суднолары белән яңарту чараларын финанслау.

Рәсми Татарстан