Язын хәрби хезмәткә чакырылучыларны махсус операция зонасына җибәрмәячәкләр

Язын хәрби хезмәткә чакырылучыларның берсен дә Украинадагы махсус операция зонасына җибәрмәячәкләр, дип белдерде Россия Кораллы Көчләре Генераль штабының Баш оештыру-мобилизация идарәсе башлыгы Владимир Цимлянский «Россия 24» телеканалы эфирында. Бу хакта РИА Новости агентлыгы хәбәр итә.

«Хәрби хезмәткә чакырылучыларның берсен дә махсус операция зонасына озатмаячаклар. Бүгенге көндә контракт нигезендә хезмәт итүчеләр һәм мобилизацияләнүчеләрнең саны безнең алда куелган бурычларны хәл итү өчен җитәрлек», - диде ул.

Цимлянский элегрәк хәбәр иткәнчә, барлык срочниклар да Россиядә даими дислокация урынында хезмәт итәчәк.

Шул ук вакытта, хәрби хезмәткә чакырылучыларны, заманча хәрби техниканы үзләштерү һәм хәрби-исәп белгечлеге алу өчен, биш айга укыту берләшмәләре һәм частьләргә җибәрәчәкләр. Шуннан соң аларны гаскәрләргә билгеләячәкләр. Генераль штабта раслауларынча, аларның барысы да «билгеләнгән вакытта хезмәтләрен төгәлләгәч, запаска җибәреләчәк һәм өйләренә озатылачак».

 https://tatar-inform.tatar

фото: https://tatar-inform.tatar/