Лениногорск «Батырлык тартмасы» (“Коробка храбрости”) Бөтенроссия акциясенә кушылды

Әлеге акциянең тарихы моннан 13 ел элек башланган, бокс буенча дөнья чемпионы Николай Валуев  хастаханәләрдә дәваланучы балалар өчен бүләкләр җыеп «Бердәм Россия» Үзәк Башкарма комитетына тапшырган.

Лениногорскида акция 4 нче мәртәбә уза. 2021 елда Лениногорскидан бүләкләр салынган беренче тартма Казанның Республика балалар клиник хастаханәсенә тапшырылды, аннан соңгы икесен Лениногорскидагы кечкенә пациентларга бүләк иттеләр. 

 “Бу чарага йомгак ясау ел ахырында, сәламәтлек саклау учреждениеләренең берсендә уза. Акциядә катнашырга теләүчеләр  яңа уенчыклар, китаплар, буяулар, өстәл уеннары һәм иҗат эшләре өчен җыелмалар алып килә ала. Алар барысы да завод төргәгендә булырга тиеш. Йомшак уенчыклар кабул ителми. Узган ел акциядә бөтен ил буйлап 166 меңнән артык кеше катнашты, балаларга биш йөз меңнән артык бүләк тапшырылды. Әлеге игелекле гамәлләр акциясенә лениногорскилыларның барсының да  кушылуын сорыйбыз. Яңа ел алды көннәрендә игътибарыбызны күбрәк безнең ярдәмгә моһтаҗ булганнарга юнәлтсәк, бу - бәйрәм  көннәрен тагы да яктырак, серлерәк итәчәк”,- диде “Бердәм Россия” партиясенең башкарма сәркатибе Игорь Храмов.  

Бүләкләр җыю илнең барлык төбәкләрендә дә бара.

Лениногорскида “Батырлык тартмасы” балалар хастаханәсенә тапшырылачак, анда сиксәннән артык бала дәвалана.

 "Батырлык тартмасы" шәһәр һәм район администрациянең 1 нче катында урнашкан, адресы: Лениногорск шәһәре, Кутузов урамы, 1 нче йорт.