Лениногорск мөхтәсибәте Рамазан ае тәмамлану уңаеннан тантаналы чара уздырды

Кичә, 30 мартта шәһәребезнең “Ихлас” мәчетендә бәйрәм намазы укылды. Төштән соң  чара «Юбилейный» паркында дәвам итте.

Җыелучыларны Лениногорск районы имам-мөхтәсибе Булат Раупов котлады. Бәйрәмдә шулай ук Лениногорск муниципаль районы Башкарма комитетының эшләр идарәчесе Марат  Якупов  катнашты, ул район җитәкчелеге Марат Гирфанов исеменнән котлаулар тапшырды.  

Ул шулай ук билгеләп үткәнчә, элек бәйрәм итү мәчет территориясе белән генә чикләнсә, хәзер «Юбилейный» паркы төрле яшьтәге кешеләрне, шул исәптән башка районнардан кунакларны җыя.

Традиция буенча «Ихлас» мәчете Ураза һәм Корбан бәйрәмнәре уңаенан яшьләр арасында футбол матчы оештыра. Быел «Юбилейный» паркы спорт мәйданчыгында бәйрәм Кубогы өчен турнир узды. Лениногорскиның футбол сөючеләрдән торган «Сатурн» командасы җиңү яулады. Хәзер аларны яңа уен көтә - 2025 елның 6 июнендә узачак Корбан бәйрәме Кубогы.  

Бәйрәмнең кечкенә кунаклары өчен конкурслар, уеннар һәм мастер-класслар оештырылды. Балалар Коръән сүрәләре укыды, ә «Высота» яшьләр үзәге белгечләре милли бизәкле түбәтәйләр ясау дәресе үткәрде. «Логос» үзәге волонтерлары балаларга хәрәкәтчән уеннар үткәрде.

Кунаклар өчен  тавык һәм сарык итеннән шашлык пешерделәр, тәмле пылау да пеште, шулай ук сәүдә нокталары эшләде.

фотолар: мэриянең матбугат хезмәте һәм Гүзәлия Нигъмәтзянова.