Лениногорскида «Тарихта без эзлебез» шәҗәрәләр конкурсында Гайнетдиновлар-Гордеевлар гаиләсе үзенчәлекле гаилә тарихын тәкъдим итте

Конкурста Лениногорск районын бары бер генә гаилә тәъдим итте, ул 400 еллык педагогик династиягә ия Гайнетдиновлар-Гордеевлар гаиләсе.

Әлеге нәселнең вәкиле – Зөлфия Габделхаковна моннан 15 ел элек үз нәселләренең шәҗәрәсе белән ныклап торып кызыксына башлаган һәм документлар, фотолар туплаган. Аның әтисе – Габделхак Гайнетдинов – озак еллар мәгариф системасында эшләгән.. Җиде баласының дүртесе – педагоглык юлын сайлаган. Укытучылар династиясенә – 400ел.

Зөлфия Гайнетдинова-Гордеева жюри хөкеменә  мул өстәл һәм фото-документлардан торган күргәзмә тәкъдим итте. Жюри әгъзалары исә – Татарстанның архив эше буенча Дәүләт комитеты белгечләре иде. 

Мул өстәл түрендә – милли ризык – бавырсак һәм бал. Зәлфия ханымның әти-әниләре умартачылык белән дә шөгыльләнгән булганнар. Алардан соң исә аларның туган йортында бу эшне Зөлфия ханым ире Николай Гордеев белән дәвам итә.

Шәҗәрәдә 7 буын вәкиле тәкъдим ителгән иде. Ул алмагач формасында ясалган. 

Гайнетдиновлар-Гордеевлар гаиләсе үзләренең нәселен яхшы белүләре, яңадан-яңа мәгълүматлар табып торуы белән жюри әгъзаларын сокландырды. 

• Әлеге фестиваль шәҗәрә традицияләрен саклауга, гаилә элемтәләрен һәм буыннар бәйләнешен ныгытуга, нәсел тамырларына һәм туган як тарихына кызыксыну уятуга юнәлтелгән.

Розалия Мостафина фотолары